足总杯直播

英格蘭足總盃，全名英格蘭足球總會挑戰盃（英文：Football Association Challenge Cup），簡稱足總盃（英文：FA Cup），係由英格蘭足球總會主辦嘅一項男子淘汰制足球盃賽，喺1871年開始舉辦，係世界上歷史最悠久嘅足球比賽。

英格蘭足總盃冠軍嘅球隊，1998年之前可以獲得下一屆歐洲盃賽冠軍盃參賽資格，1999年歐洲盃賽冠軍盃停辦，冠軍球隊改為參加歐洲足協盃，2009年改制冠軍球隊可以獲得下一屆參加歐霸盃分組賽嘅資格。如果冠軍球隊因為聯賽排名獲得歐洲聯賽冠軍盃或歐霸盃嘅參賽資格，以前呢個歐霸盃嘅參賽名額會畀足總盃亞軍球隊，但係需要參加歐霸盃外圍賽。由2015–16年度開始，呢個名額唔再畀足總盃亞軍球隊，呢個名額改為畀英格蘭超級聯賽排名最高又冇歐洲賽資格嘅球隊補上，補上嘅球隊要參加外圍賽第三圈。

英格蘭足總盃並冇設立種子球隊，對賽球隊同主客場都係由抽籤決定。比賽共分八圈進行，頭兩輪先畀英甲、英乙同非聯賽球隊參加，而英超同英冠球隊就係第三圈加入比賽。除咗八強（2017年開始）、準決賽（2000年開始）同決賽之外，每圏若果喺90分鐘之內打成平手，都需要重賽，重賽之戰兩隊主客場交換。重賽若果喺90分鐘之內打成平手，就需要加時再決定勝負，如果加時都重未分出勝負，就要以互射十二碼決勝負。

準決賽（2000年開始）同決賽喺中立場舉行，對賽隊伍若果90分鐘之內打成平手，就需要加時決勝負，如果加時都未分出高下，就要以互射十二碼決勝負。