西班牙甲組足球聯賽（Primera división de Liga，簡稱 La Liga）係西班牙頂級嘅職業足球聯賽，亦屬於歐洲與及世界級最高水平嘅職業足球聯賽之一，通常簡稱「西甲」。

西甲聯賽嘅球風注重技術同埋進攻，具有好高嘅觀賞性。目前有好多世界最著名嘅球員都係喺西甲球會效力，其中皇家馬德里同埋巴塞隆拿，佢哋嘅比賽叫做西班牙嘅「國家打吡」。

賽事以雙循環主客制，贏波球會得3分，和波得1分，輸波0分。以積分計算球隊成積，咁啱積分一樣嘅話，會計對賽成積，如果都分唔到勝負就計對賽得失球（作客入球雙計），跟住就會計得失球，再計較多得球。

目前西甲有20支球隊，每完成咗整個賽季嘅賽事之後，有最高聯賽積分嘅就係聯賽冠軍，積分榜頭4名可以參加下屆歐聯，第5、6名可以參加歐霸盃，成績最差嗰三隊將會降班去西乙，而喺西乙嘅前三名就會升班去西甲。

西甲球隊同其它聯賽嘅球隊一樣都有一隊同埋預備隊（即係B隊），而且呢兩隊都係參加緊同一個聯賽系統。不過兩隊唔可以一齊參加同一個聯賽，例如巴塞隆拿B隊攞到高名次至符合升班資格，但祗要巴塞隆拿重喺西甲踢緊，巴塞隆拿B隊都唔可以升班，但可以保留佢哋嘅名次，之後將另外一個升班名額讓畀其它符合升班資格嘅球隊。相反，如果巴塞隆拿降班去西乙，巴塞隆拿B隊最後排第幾都要降班去西乙二。

2019–20年西班牙甲組足球聯賽參賽隊伍共有 20 支。