英格蘭超級足球聯賽（英文：Premier League，簡稱英超聯或者英超）係英格蘭嘅頂級足球聯盟賽事。

英格蘭超級足球畀人嘅一貫比賽形象係節奏快，攻勢組織多，參賽嘅球員亦非常搏命；而喺英超搵食嘅足球員，多數係來自世界唔同國家嘅高質素足球員，因此比起其他一般嘅聯賽有高好多嘅比賽水準；亦因為咁嘅原因，喺東南亞好多地方嘅人（包括香港）都比較鍾意睇英超嘅賽事。

聯賽採取主客雙循環賽制比賽，每一隊同各個球隊對賽兩次，主客各一次。由1995-96年球季開始參賽球隊由22隊減至20隊，每支球隊共進行38場賽事，無論主場或者作客比賽各有19場。每場嬴波可得3分，打和得1分，輸波0分，按各隊喺聯賽所得嘅積分排列。

喺2005至2006年度球季共有20隊球隊參與角逐，踢晒所有賽事後總積分最高嗰隊可以奪得聯賽冠軍，而總積分最低嗰3隊球隊就會降班落英格蘭冠軍聯賽。同時，冠軍聯賽頭2名肯定獲得下個賽季嘅升班資格，而冠軍聯賽的第3至6名就會踢附加賽嚟爭最後一個升班資格。

2023至23年球季總共20隊，包括升班嘅英冠聯賽冠軍富咸，亞軍般尼茅夫同埋附加賽冠軍諾定咸森林。

而家嘅英超冠軍獎盃由皇家珠寶商愛絲普蕾負責鑄造，重4英石（25千克），高43厘米同深25厘米，主體為合金銀，表面電鍍純銀，底座由孔雀石造成，表面蓋有銀環，刻有冠軍球會嘅名單，孔雀石嘅綠色代表球場嘅草坪。獎盃設計取材自英格蘭足球傳統嘅「三獅」紋章，佢嘅上面有金冠，兩隻獅子分據獎盃手柄嘅上方，第三隻獅子即球季結束高舉獎盃嘅冠軍球隊隊長。手柄上綁嘅彩帶印上嘅英超名則按照返冠名贊助嘅名。