曼徹斯特聯隊（英文：Manchester United Football Club，簡稱曼聯，紐交所：MANU）係英倫曼徹斯特嘅足球會。

曼聯喺1878年創會於，起初由一班鐵路工人組成，原名紐頓希夫鐵路會（Newton Heath L&Y Railway F.C.），後來球會窮到一度將近破產，好得金主亨利戴維斯（John Henry Davies）力挽狂欄渡過難關。1902年正式改名為曼車士打聯會。

1910年，曼聯入主奧脫福球場（The Old Trafford Stadium）。經多番改建後，今時今日坐得入超過76,000位觀衆，論其呎碼計，算得係英倫數一數二。

曼聯創會至今歷經好多逆境，其中就有1958年2月6號慕尼黑空難。當其時新紥球星鄧肯‧愛華士（Duncan Edwards）連同其他6名球員全數罹難，重創球會士氣。領隊麥‧畢士比爵士（Sir Matt Busby）重傷好返後用十年時間重建球會。喺1968年，曼聯喺歐洲冠軍球會盃決賽4比1擊敗有葡萄牙球王尤西比奧（Eusébio da Silva Ferreira）在陣嘅賓菲加，得到球會史上第一座歐洲冠軍球會盃冠軍獎盃。

1970年，畢士比爵士退休，曼聯成績下滑，跌入谷底。1974/75球季，曼聯喺當屆最後一場聯賽輸畀同城死敵曼城，射入致勝入球嘅正正係曼聯前三劍俠之一嘅丹尼斯‧羅（Dennis Law）。曼聯宣佈降班次一級聯賽，呢次亦係曼聯目前為止唯一一次降班。次年曼聯重返甲組，但往後十年成績唔算出色。