阿士東維拉（Aston Villa Football Club）係英格蘭一間足球會，位於英格蘭中部嘅伯明翰。佢喺1874年創立，係1888年甲組聯賽（英格蘭第一個足球聯賽）同埋1992年英超聯第一屆賽事嘅球隊。佢而家打緊英超，主場係伯明翰維拉公園球場。

以前阿士東維拉喺甲組嗰陣，贏過七個聯賽冠軍，同埋七個足總盃。英超成立之後，維拉成日都排頭幾位，甚至排過榜首，只係佢嘅表現冇咁穩定。踏入2010年代維拉經常為護級而戰，而2015年至2016年英格蘭超級足球聯賽自第一輪贏咗之後19場未贏過，最後喺第34輪作客輸畀曼聯之後，宣佈護級失敗，歷嚟首次自英超降班。

2019年喺升班附加賽決賽以2-1擊敗打比郡，重返英超比賽。