皇家馬德里足球會（Real Madrid Club de Fútbol，中文簡稱：皇馬）係西班牙首都馬德里嘅一間足球會，1902年3月6號成立，係而家歐洲至全世界球壇最成功嘅球會之一，2000年12月11號國際足球協會選咗皇家馬德里為20世紀最偉大嘅球會。

皇家馬德里喺歷史上一直係歐洲最成功嘅球會，曾經攞過14次歐聯冠軍，係目前贏得最多歐聯冠軍嘅球會。而本土方面一共攞到35次西班牙甲組聯賽冠軍、19次西班牙國王盃冠軍同埋12次西班牙超級盃。

皇家馬德里而家重有預備隊皇家馬德里卡斯迪拿（Real Madrid Castilla，打緊乙二組聯賽）同埋多支梯隊。

另外皇家馬德里喺1932年成立籃球隊－皇家馬德里特佳（Real Madrid-Teka），而且球隊成就同足球隊一樣咁勁，10次成為歐洲冠軍同多次成為本土籃球聯賽冠軍。

皇家馬德里原名「馬德里足球會」（Madrid Football Club），係一班球迷喺1902年3月6號成立，波衫係全白色、配白色短褲同藍襪。同年參加慶祝西班牙國王亞利方疎十三世登基而創辦嘅國王盃，但不敵巴塞隆拿。1904年馬德里足球會同同市嘅 Moderno Amicale 同 Moncloa 合併。球會成立冇幾耐就成為西班牙勁旅之一，更多次贏得西班牙國王盃。其中球會由1908年開始連續四年奪得國王盃，成為西班牙首間可以永久保存國王盃嘅球會。1910年球會委任英國人阿瑟·莊臣（Arthur Johnson）為第一位領隊。兩年後（1912年），當時一位寂寂無名嘅青年球員加入球隊，佢叫做聖地牙哥·班拿貝（Santiago Bernabéu）——即係後嚟帶領皇馬走上高峰嘅球會主席。經過長久嘅奮鬥，馬德里足球會喺1916年重奪國王盃。1917年，亞利方疎十三世為表揚球隊佳績，向馬德里足球會賜封「皇家」（Real）頭銜。1920年6月26號，「皇家馬德里」成為球會正式名。