華倫西亞足球會（Valencia Club de Fútbol，西班牙文簡寫：Valencia CF、Valencia、VCF，花名：Los Ches或蝙蝠軍團或馬斯泰拿，中文簡稱：華倫或華西）係西班牙甲組足球聯賽嘅足球會之一，喺1919年創立，位於西班牙嘅第三大華倫西亞市。華倫西亞係一支有悠久歷史嘅老牌勁旅，係西班牙傳統五強之一，會員人數係西班牙中第三多。早期球隊因身穿白色上衫同白色短褲，所以有「白幽靈」嘅稱號。華倫西亞同市死敵係利雲特，大區死敵係維拉利爾。華倫西亞素以風格平穩見稱，特點係快速攻守轉換，打穩守突擊。

華倫西亞係聞名歐洲嘅勁旅之一，絕大部分時間都係喺西甲渡過，自從1930/31賽季奪得乙組冠軍升上甲組之後，一直都係喺西甲作賽，直到1985/86賽季先至意外降班，之後即刻就以乙組冠軍嘅身份重返甲組，自此球隊一直留喺西甲。60年代係球隊最光輝嘅時刻，1961/62第四屆歐洲博覽會杯，球隊就攻入33個波，創造咗城市博覽會盃嘅最多入波紀錄，當中包括8強10:3狂數布達佩斯MTK，決賽7:3橫掃巴塞隆拿。第二年亦都蟬聯咗城市博覽會杯冠軍。 1963/64賽季，華倫西亞期望創造三連冠嘅神話，但呢一次就喺決賽以1:2輸畀皇家薩拉戈薩，屈居亞軍。另外，華倫西亞曾經喺1980年贏咗歐洲盃賽冠軍盃冠軍。跟住，華倫西亞又喺歐洲超霸盃力克英格蘭嘅諾定咸森林，呢次係第一次有西班牙球隊奪得歐洲超霸盃。

華倫西亞贏過6次西甲冠軍、7次西班牙盃冠軍、3次歐洲足協盃冠軍、1次歐洲盃賽冠軍盃冠軍同埋2次歐洲超霸盃。

1919年5月21號，華倫西亞嘅第一場比賽係為咗慶祝建城日，喺卡斯迪隆省同Real Gimnástico比賽。嗰日嘅出場陣容係 Marco，Amador Peris，Julio Gasco，Fernando Marzal，Pepe Llobet，Antonio Ferre，Luis Fernandez，Umbert，Martinez Ibarra，Aliaga 同 Gomez Juaneda。呢場比賽過後，華倫西亞意識到需要一個屬於自己嘅球場。

球會管理層希望將主場定喺阿基羅斯，但係為咗等足協答應呢個要求，球會重有好多嘢要做，例如起圍牆之類嘅安全措施同解決起球場嘅資金問題。尤其係資金問題，搞到球會傷透腦筋，直到一個無名氏嘅捐獻者出現，呢個好心人一共捐出咗25,000比塞塔。呢啲錢足夠實行球會嘅計劃，將阿基羅斯嘅土地變成足球場。聽講呢位好心人係 Gonzalo Medina，他將自己本嚟用嚟結婚嘅錢捐咗出嚟。婚禮就咁推遲咗足足成年。佢話：「華倫西亞先係我最先考慮嘅嘢。」